Максат: Балаларга светофор турында төшенчә бирүне дәвам итү, светофорның төсләрен аера белү күнекмәләрен ныгыту. Балаларның фикерләү, анализлау сәләтләрен, игътибарлыкларын арттыру, хәтерләрен яхшырту; автобус тукталышы юл билгесе белән танышу; бер-берсенә тыйнаклык, мәрхәмәтлелек тәрбияләү.
Җиһазлау: Тар һәм киң юллар, светофор макеты, җәяүле юлы, тукталыш билгесе, кызыл, яшел, сары түгәрәкләр, руль.
Эшчәнлек барышы
Тәрбияче: Хәерле көн, балалар! Кәефләрегез ничек? Карагыз әле, безгә кунаклар килгән, ягез әле исәнләшик.
Балалар: Исәнмесез, хәерле көн.
Тәрбияче: Без Сезнең белән бүген юлда йөрү кагыйдәләрен кабатлап алырбыз. Сөйләштекме?
Әкрен генә Шүрәле керә.
Тәрбияче: Балалар, ни бу?Нишләп йөри монда?
Шүрәле: Танайка урманына кайтып китәргә кирәк, юл эзләп йөрим. Җитмәсә телефонның зарядкасы утырды.
Тәрбияче: Борчылма Шүрәле,сиңа урманыңа кайтырга булышырбыз. Без бүген юл йөрү кагыйдәләрен кабатлап, ныгытып аласы идек, әйдә әле син дә безнең белән бул.
Шүрәле: Урмандагы юллардан бик тиз элдерәм мин, ярар соң, сезнекен дә өйрәним әле. Юкса ниндидер шакмаклы предметлар кычкыртып җафалады.
Тәрбияче: Ул шакмаклы предметлар - транспорт дип атала.
Шүрәле: Транспорт!?
Тәрбияче: Балалар, әйтегез әле, нинди төр транспорт була?
Балалар: йөк, җиңел, автобус...
Экранда слайдлар бара
Тәрбияче: Бу нинди төр?...
Шүрәле: Яхшы, ә алар кайда йөри?
Тәрбияче: Юлда йөриләр
Алда ике төрле юл ята - киң һәм тар.
Тәрбияче: Монда ике юл киткән, без кайсы юлдан барырбыз икән? Киң юлдан безнең нәрсәләр йөри әле?
Балалар: Машиналар.
Тәрбияче: Дөрес, тар юлдан кемнәр йөри?
Балалар: Кешеләр, балалар.
Тәрбияче: Әйдәгез, без сезнең белән тар юлдан китәрбез.
Шүрәле ялгышып машина юлына кереп китә, юл хезмәткәре аны сызгыртып туктата
Юл хезмәткәре: Иптәш сез кая барасыз? Монда бит машиналар гына йөри.
Шүрәле: Әнә бит алар да шуннан бара.
Юл хезмәткәре: Юк, балалар җәяүле юлыннан бара, барыгыз шунда чыгыгыз.
Шүрәле: Яхшы.
Балалар:
Тротуардан атлыйбыз, (балалар бер урында атлыйлар)
Кагыйдәне саклыйбыз, (бармак белән яныйлар)
Урам аша чыкканда - (аякларны югары күтәреп)
Сулга, уңга, карыйбыз. (тар юлдан чыгалар)
Җәяүле юлына килеп җитәләр
Шүрәле: Бу монда нишләп ята?
Тәрбияче: Нәрсә турында әйтәсең?
Шүрәле: Зебра.
Бала: Бу бит сез уйлаганча җәнлек түгел, юл билгесе. Җәяүлеләр чыга торган урын.
Тәрбияче: Сырлы-сырлы булганга, аны шулай зебра дип атыйлар.
Шүрәле: Менә ничек (чыгып китә).
Тәрбияче: Тукта әле, Шүрәле дус, ашыкма , як ягыңа карамыйча чыкма син. Әйдәгез, балалар, бергәләп чыгыйк.
Юл аркылы чыгалар, бераз баруга, светофор очрый.
Шүрәле: О нинди өч күзле багана!
Тәрбияче: Балалар, әйдәгез әле Шүрәлегә ни икәнен аңлатып бирик.
Бала: Ә бу светофор, ул безгә һәм машиналарга юл күрсәтүче.
Тәрбияче: Әйе, бик дөрес.
1 бала:
Урамны күзәтеп,
Ваемсызны кисәтеп,
Чатта тора светофор,
Сакта тора светофор.
2 бала:
Янып тора өч күзе
Күреп тора ич безне
Әйтеп тора өч сүзне:
Кузгалма! - ди - кызыл күз.
Сабыр! - ди - сары күз.
Ярый, - ди - яшел күз.
Тәрбияче: Я, Шүрәле дус, аңладыңмы инде?
Шүрәле: Бераз аңладым кебек.,
Тәрбияче: Ныгыту өчен, әйдәгез уйнап алыйк.Уеныбыз "Кызыл, сары, яшел" дип атала. Кызыл төскә-чүгәлибез, сары төскә-басабыз, яшел төскә-атлыйбыз.
Шүрәле башта ялгыша, бераздан өйрәнә.
Тәрбияче: Ә хәзер юл аркылы чыгабыз (машиналар уза, аннары балалар) Юл хезмәткәре күзәтеп тора.
Шүрәле: Урманга да куйсаң бу светофорны менә дә шәп булыр иде.
Алда автобус тукталышы.
Тәрбияче: Балалар, бу нинди юл билгесе?
Балалар: Автобус тукталышы.
Тәрбияче: Яшы, дөрес. Автобус белән кая барып була?
Балалар:...
Тәрбияче: Ә хәзер автобуста үз-үзеңне тоту кагыйдәләре белән танышыйк.
- Кергәндә, чыкканда этешмәскә.
- Кычкырып сөйләшмәскә.
- Чүп ташламаска
- Саклагыч каешларын эләктерәләр.
Шүрәле: Ничек өйрәнеп бетерәсез бу кадәр әйберләрне?
Тәрбияче: Тырышсаң була. Ә хәзер без сине автобуска утыртып урманыңа кайтарып куябыз.
Автобуска утыргач, саклагыч каешларын эләктерәләр. Автобус йөртүче тукталышларны әйтеп бара.
Тәрбияче: Менә Шүрәле синең тукталыш.
Шүрәле: Рәхмәт Сезгә, балалар. Бик күп нәрсәләргә өйрәттегез сез мине.
Тәрбияче: Әле безнең сиңа бүләгебез дә бар, янып торучы билге. Икенче юлы шәһәргә килгәндә шушы билге белән килсәң, сине машина йөртүчеләр ерактан ук күреп торырлар.
Шүрәле: Рәхмәт, мин бик шат.
Шүрәле урманда кала, балалар кире кайта.
Тәрбияче: - Сезнең белән бүген кемгә булыштык?..
- Шүрәлегә нинди юл кагыйдәләре өйрәттек?..
Балаларның җаваплары
Тәрбияче: Ә без шөгылебезне җыр белән тәмамлыйк.